औद्योगिक पुरस्काराने गायकवाड सन्मानित; सासवड शहरात पुरस्कार वितरण सोहळा

वाघापूर, दि. २६ (वार्ताहर) — पुरंदर तालुक्यातील अंबळे ग्रामपंचायतीच्या माजी सदस्य तथा संजीवनी गृह उद्योगाच्या संस्थापिका संजीवनी विनायक गायकवाड यांचा सासवड येथे आदर्श औद्योगिक पुरस्कार देऊन सन्मान करण्यात आला.

महाराष्ट्र राज्य ग्रामीण जीवनोन्नती अभियान, तालुका कक्ष पुरंदर व कन्हामाई प्रभाग संघ यांच्या वतीने हा पुरस्कार प्रदान करण्यात आला.

संजीवनी गृह उद्योगाच्या माध्यमातून तयार करण्यात येणारे घरगुती पदार्थ सर्वदूर पोहोचविण्याचे काम संजीवनी गायकवाड यांनी केले आहे. त्यांच्या उद्योगातून महिलांना रोजगाराच्या संधी उपलब्ध करून देण्यासोबतच स्थानिक उत्पादनांना बाजारपेठ मिळवून देण्याचे कामही केले जात आहे.

गायकवाड यांच्या कार्याची दखल घेत त्यांना ‘दैनिक प्रभातचा सुपर वुमन’ हा पुरस्कारही यापूर्वी मिळाला आहे. त्यांच्या यशाबद्दल विविध क्षेत्रातील मान्यवर व लोकप्रतिनिधींकडून त्यांच्यावर कौतुकाचा व अभिनंदनाचा वर्षाव होत आहे.

यावेळी पुरंदर पंचायत समितीचे सभापती अमित झेंडे, जिल्हा परिषद गटाच्या सदस्या रुपाली झेंडे, माजी जिल्हा परिषद सदस्या ज्योती झेंडे, शिवसेना उपजिल्हाप्रमुख वैशाली काळे, प्रभाग संघ अध्यक्षा अलका बडदे यांच्यासह परिसरातील महिला मोठ्या संख्येने उपस्थित होत्या.

महिला बचत गट व ग्रामीण भागातील उद्योगांना प्रोत्साहन देण्यासाठी अशा पुरस्कारांमुळे नवउद्योजकांना प्रेरणा मिळते. संजीवनी गायकवाड यांच्या कार्यामुळे परिसरातील महिलांमध्येही उद्योगाची नवी उमेद निर्माण झाली आहे.

छायाचित्र कॅप्शन:
सासवड : आदर्श औद्योगिक पुरस्कार स्वीकारताना संजीवनी गायकवाड.

स्रोत: वार्ताहर, संजीवनी न्यूज